पनवेलमधील १७ ग्रामपंचायतींच्या निवडणुका जाहीर, ५ नोव्हेंबरला मतदान
प्रभात पर्व न्यूज - Published: 04-Oct-2023 12:53 pmमुंबई : राज्यातील अनेक महानगरपालिका व जिल्हा परिषदांच्या निवडणुका प्रलंबित असताना स्थानिक स्वराज्या संस्थेतील अंतिम घटक असलेल्या ग्रामपंचायतींच्या निवडणुका जाहीर झाल्या आहेत. राज्यभरातील सुमारे २ हजार ३५९ ग्रामपंचायतींच्या सार्वत्रिक निवडणुकांसाठी आणि २ हजार ९५० सदस्यपदाच्या; तर १३० सरपंचांच्या रिक्तपदांच्या पोटनिवणुकांसाठी ५ नोव्हेंबर २०२३ रोजी मतदान होणार आहे. यामध्ये पनवेल तालुक्यातील १७ ग्रामपंचायतीचा समावेश आहे.
निवडणूक आयोगाने जाहीर केलेल्या निवडणूक कार्यक्रमानुसार, १६ ते २० ऑक्टोबर सकाळी ११ ते ३ या वेळेत अर्ज दाखल करणे, २३ ऑक्टोबरला दाखल अर्जाची छाननी तर २५ ऑक्टोबरपर्यंत अर्ज माघारी घेण्याची मुदत असणार आहे. त्याच दिवशी निवडणूक चिन्हांचे वाटप करण्यात येईल. निवडणूक ५ नोव्हेंबरला घेण्यात येणार असून, ६ नोव्हेंबर रोजी मतमोजणी होणार आहे. दरम्यान, संबंधित ग्रामपंचायतींच्या क्षेत्रात आचारसंहिता लागू करण्यात आली आहे.
निवडणूक जाहीर झालेल्या पनवेलमधील ग्रामपंचायती :
दुंदरे, दापोली, चिखले, विचुंबे, देवद, सोमटणे, ओवळे, भिंगार, गिरवले, कसळखंड, माळडुंगे, वावेघर, न्हावे, तुराडे, कोन, गुळसुंदे, वाघिवली