पनवेल : पनवेल प्रभाग समिती 'ड' मार्फत आज ( गुरूवार ८ मे) मोठी अतिक्रमण विरोधी कारवाई करण्यात आली. पनवेल महानगरपालिका प्रभाग समिती ड हद्दीतील अंतिम भूखंड क्रमांक २१७ मधील पनवेलमधील ऐतिहासिक ज्यू दफनभूमीशी संबंधित असलेल्या वादग्रस्त जागेवरील अनेक घरे आणि इतर बांधकामांवर महापालिकेच्या अतिक्रमण विभागाच्यावतीने तोडक कारवाई करण्यात आली. पोलिसांच्या कडेकोट बंदोबस्तात न्यायालयीन आदेशानुसार ही निष्कासन कारवाई करण्यात आली.

      आयुक्त मंगेश चितळे यांच्या सूचनेनूसार ही कारवाई करण्यात आली. या कारवाईवेळी मा.अतिरिक्त आयुक्त महेशकुमार मेघमाळे , सहाय्यक आयुक्त तथा प्रभाग अधिकारी डॉ. रूपाली माने तसेच प्रभारी प्रभाग अधीक्षक राजेश डोंगरे व पोलीस दल,अग्निशमन दल, रायगड सुरक्षा रक्षक, एम एफ चे सुरक्षा बल तसेच सर्व प्रभागातील अतिक्रमण कर्मचारी उपस्थित होते. अनधिकृत व्यवसाय करणाऱ्या व अनधिकृत अतिक्रमण करणाऱ्यांच्या विरोधात महापालिकेने तोडक कारवाईचा बडगा उचलला असून यापुढेही अतिक्रमणांवर अशाच प्रकारची कारवाई पुढेही सुरू राहील, असे महापालिकेतर्फे सूचित करण्यात आले आहे.