कळंबोली : कळंबोली येथील सेक्टर-१५ मधील सिद्धिविनायक हॉस्पिटलसमोर बेशुद्ध अवस्थेत आढळलेल्या एका अनोळखी इसमाचा मृत्यू झाल्याची घटना घडली आहे. या इसमाची ओळख अद्याप पटलेली नसून, त्याची माहिती मिळाल्यास कळंबोली पोलिसांशी संपर्क साधण्याचे आवाहन करण्यात आले आहे. 

           पोलिसांनी दिलेल्या माहितीनुसार, १२ जून २०२६ रोजी संबंधित इसम बेशुद्ध अवस्थेत पडलेला आढळून आला. त्याला तातडीने उपचारासाठी उपजिल्हा रुग्णालय, पनवेल येथे दाखल करण्यात आले. मात्र, डॉक्टरांनी तपासणी करून दुपारी १२.१० वाजता उपचारापूर्वीच त्याला मृत घोषित केले. या प्रकरणी कळंबोली पोलीस ठाण्यात अकस्मात मृत्यूची नोंद करण्यात आली असून पुढील तपास सुरू आहे.

            मृत इसमाचे वय अंदाजे ४० ते ४२ वर्षे असून तो अंगाने सडपातळ आहे. त्याचा रंग काळा, चेहरा उभट, केस काळे-पांढरे आणि नाक बसके आहे. त्याच्या अंगावर काळ्या-खाकी रंगाचा पूर्ण बाह्यांचा शर्ट व काळ्या रंगाची ट्रॅक पॅन्ट होती. या इसमाची ओळख अथवा त्याच्या नातेवाईकांबाबत माहिती असल्यास कळंबोली पोलीस ठाणे किंवा तपास अधिकारी पोलीस उपनिरीक्षक सुनिल होलार (मो. ८१०८१६१७०९) यांच्याशी संपर्क साधण्याचे आवाहन करण्यात आले आहे.