पनवेल : स्वच्छ भारत अभियानांतर्गत पनवेल महानगरपालिकेच्या वतीने राबविण्यात येत असलेल्या “स्वच्छतेसाठी महापौर आपल्या प्रभागात” या विशेष मोहिमेंतर्गत आज, (शनिवार दि. ९ मे) प्रभाग क्रमांक १८ मध्ये अत्यंत नियोजनबद्ध पद्धतीने स्वच्छता मोहीम राबविण्यात आली. या मोहिमेच्या माध्यमातून परिसराची स्वच्छता करून महापौर नितीन पाटील यांनी नागरिकांपर्यंत स्वच्छतेचा संदेश पोहोचविला.

      या व्यापक स्वच्छता मोहिमेत सभागृह नेते प्रकाश बिनेदार, महापालिका सदस्य सुमित झुंजारराव, स्नेहल ढमाले तसेच प्रीती जॉर्ज यांनी उपस्थित राहून स्वच्छता दूतांचा उत्साह वाढविला. तसेच पालिकेचे विभाग प्रमुख अनिल कोकरे, मुख्य आरोग्य निरीक्षक अरुण कांबळे तसेच संबंधित प्रभागांतील स्वच्छता निरीक्षक उपस्थित होते. मोहिमेदरम्यान प्रभाग १८ मधील विविध महत्त्वाच्या ठिकाणांसह अंतर्गत रस्ते व गल्ल्यांची सखोल स्वच्छता करण्यात आली. यामध्ये पालिका मैदान परिसर, देवाळे तलाव, महात्मा गांधी उद्यान परिसर, भुसार मोहल्ला, मांडावकर वाडा, जय भारत नाका परिसर, ठाणा नाका रोड तसेच वाल्मिकी नगर रोड या परिसरांचा समावेश होता.

         या मोहिमेत प्रभाग क्रमांक १४ ते २० मधील सुमारे २०० स्वच्छता दूत, पर्यवेक्षक तसेच घंटागाडी विभागातील कर्मचाऱ्यांनी सक्रिय सहभाग घेतला. सर्व कर्मचाऱ्यांच्या समन्वयातून संपूर्ण प्रभागात एकाच वेळी स्वच्छता उपक्रम राबविण्यात आल्याने मोहिमेला अधिक वेग व परिणामकारकता प्राप्त झाली. साफसफाईबरोबरच विविध पूरक उपाययोजनांवरही विशेष भर देण्यात आला. पावसाळ्याच्या पार्श्वभूमीवर नाल्यांमधील कचरा काढून पाणी निचरा सुरळीत राहावा यासाठी नाला साफसफाई करण्यात आली. तसेच नागरिकांना ओला व सुका कचरा वेगळा करण्याबाबत प्रात्यक्षिकांसह मार्गदर्शन करण्यात आले. डासांच्या प्रादुर्भावाला आळा घालण्यासाठी संपूर्ण परिसरात जंतुनाशक धूर फवारणी (फॉगिंग) करण्यात आली.या उपक्रमादरम्यान महापौर नितीन पाटील यांनी प्रत्यक्ष उपस्थित राहून कामाची पाहणी केली.

     “स्वच्छ पनवेल – सुंदर पनवेल” हे ध्येय साकार करण्यासाठी नागरिकांनीही स्वच्छता उपक्रमात सक्रिय सहभाग नोंदवून प्रशासनाला सहकार्य करावे, असे आवाहन पनवेल महानगरपालिकेच्या वतीने करण्यात आले आहे.